CEBU, Philippines – Patay ang 30-anyos nga lalaki human nahutdan og dugo dihang nadunggaban sa iyang gikulata gamit ang buak nga botelya sa Sitio Galaxy, Tangke, Dakbayan sa Talisay niadtong Huwebes sa hapon.
Ang namatay mao si Manuel Nicenea, 30, samtang ang suspek mao si Justin Tabay, 18, pulos nagpuyo sa maong dapit.
Si SPO1 Maximo Cuyacot, imbestigador sa Talisay City Police Station, nagkanayon nga nagduwa ang suspek og piso net dihang naabot ang biktima.
Giingong gipasanginlan sa biktima ang suspek nga maoy nagkawat sa ilang mga butang hinungdan nga iya kining gikulata.
Apan dihang naparok ang biktima sa semento nakakita kini og botelya hinungdan nga iyang gipunit dayon gibuak ug gihansak sa walang bukton sa biktima. Nisibat ang suspek samtang ang biktima dugay nga nadala sa tambalanan hinungdan nga nakabsan gyud kini sa kinabuhi.
Pipila ka oras ang nilabay, nipatim-aw ang suspek sa buhatan sa kapolisan aron motahan ug gitanggong samtang nagpaabot nga pasakaan og kaso. (/GMR)(BANAT NEWS)