CEBU, Philippines – Nakalingkawas sa tulis ang usa ka tindera og burger human siya nanguros ug nitago sa refrigerator sa Tabunok, Dakbayan sa Talisay niadtong niaging kaadlawon.
Ang biktima mao si Josie Cuerdo, 37, minyo nga taga Barangay Mohon sa nahisgutang siyudad.
Si SPO1 Erwin Carbonquilo sa Talisay City Police Station nibutyag nga nagbantay ang biktima sa tindahan nga Angel’s Burger dihang naabot ang usa ka lalaki ug kalit lang nition sa wala matino nga armas dayon deklarar og tulis.
Si Cuerdo nga pwerteng kurata ang nakapanguros ug ni-estorya sa tulisan nga wala na siyay halin.
Wala sab makahigayon ang tulisan sa pagsulod tungod kay sirado man ang tindahan.
Si Cuerdo nagpakaaron-ingnon nga mosulod sa patty sa refrigerator apan diay siya nipasalipod aron dili na makakita sa tulisan.
Nagsige og estorya ang kriminal sa biktima nga mohaw-as apan wala kini niya paminawa hangtud nga nibiya na lang kini sa lugar.
Dakung pasalamat sa biktima dihang nisaysay sa panghitabo ngadto sa kapolisan. (/GMR)(BANAT NEWS)