Pamilya sa 4-anyos nidangop sa NBI

CEBU, Philippines – Nidangop sa National Bureau of Investigation ang apohan sa 4-anyos nga lalaki nga napusilan sa Barangay Ermita, Siyudad sa Sugbo.

Si Celirina Abatayo uban ang kabanay niini nihangyo sa NBI nga maoy moimbestigar sa kamatayon ni Bladen Skyler Abatayo.

Wala na mokomento pa ang pamilya sa biktima sa nahitabo apan gitugyan na nila sa NBI ang imbestigasyon.

Si Atty. Dominador Cimafranca, assistant regional director sa NBI-7, nagkanayon nga pormal nga nipasaka og reklamo ang pamilyang Abatayo diin ang complainant ang inahan ni Skyler.

Matud ni Cimafranca nga mamahimo nga mopahigayon sila og reenactment sa nahitabo ug i-summon ang mga polis sa Carbon Police Station.

Ang NBI nangayo na kini sa pamilya sa biktima og bisan unsa nga ebidensya nga anaa kanila nga makatabang sa pagsulbad sa kaso lakip na niini ang medical report ug police report.

Sa posibilidad nga ipaubos sa re-autopsy ang lawas sa bata, matud ni Cimafranca nga magdepende kini sa evaluation sa medico-legal sa NBI.

Samtang gipaubos sa paraffin test  ang upat ka operatiba sa Drug Enforcement Unit sa Carbon Police Station ug gipa-ballistic examination ang ilang mga armas alang sa imbestigasyon sa maong kaso.

Ang hepe sa Investigation and Detective Management Branch nga si Police Supt. Ryan Devaras nipadayag nga pamatuod lang kini nga nakig-alayon ang Cebu City Police Office sa imbestigasyon sa kaso ug abli sila kon unsa man ang resulta.

Pasalig sa CCPO nga walay bias ang himoong imbestigasyon sa pagkapagan sa bata.

"We are very transparent. Kasi ang crime laboratory is an independent unit, dili man na sa CCPO. Naa sad silay integrity of course," si Devaras nagkanayon.  Si Abatayo naigo sa saag nga bala gikan sa operasyon sa kapolisan human nakadawat og sumbong nga adunay upat ka tawo nga nagsuyop ug nag-repack og shabu sa Sitio Bato sa maong lugar. (Camille L. Pateres/GMR)(BANAT NEWS)