CEBU, Philippines — Nasikop sa kapolisan ang usa ka lalaki nga nagtanum og marijuana sa iyang pinuy-anan sa Sitio Pajo, Lawaan 1, Dakbayan sa Talisay kagahapon sa alas 4:30 sa kaadlawon.
Ang dinakpan mao si Marc Jimn Alngog, 29, ulitawo nga usa ka ceiling installer nga nagpuyo sa maong dapit.
Nakit-an sa kapolisan ang upat ka punoan sa marijuana sa panimaye sa suspek hinungdan nga gidala kini sa Talisay City Police Station.
Si Alngog nitug-an sa Banat News nga konsumo lang niya ang gitanum kay siya aduna’y sakit nga asthma.
“Mao man gud ni akong nabasahan sa social media nga tambal gyud ang marijuana. Gani legal mani sa ubang nasud pero nahibong lang ko nga bawal sa atoa nga makaayo mani sa akong hubak,” matud sa suspek kinsa pasakaan gyud og kaso.
Samtang duha ka gikatahapang pusher og shabu ang nadakpan sa buy-bust operation sa Purok Tambis, Umapad, Dakbayan sa Mandaue ug laing duha ang naka-eskapo alas 10 pasado niaging gabii.
Si Police Officer 2 Juanito Libre Jr. sa Presinto 5 sa Mandaue City Police Office niila sa nadakpan nga sila si Joel Descatsar alyas Pedro, 24, ug Ivan Flores Melitante, 32, pulos nagpuyo sa maong dapit.
Ang duha nakuhaan og duha ka pakete sa shabu ug mga drug paraphernalia samtang ang laing duha ka kauban nga nakamatikod nga polis ang ilang kustomer ang nakahigayon og dagan. (GMR) (BANAT NEWS)