CEBU, Philippines — Gitanggong sa selda sa kapolisan sa Dakbayan sa Danao ang nanghagit og away sa mga molupyo sa Barangay Sabang alas 5 pasado sa hapon niadtong Biyernes ug nasakmit ang gidala niining kutsilyo.
Si Police Officer 1 Gypsy Miro sa Danao City Police Station niila sa nadakpan nga si Dioscoro Porlas Lawas, 39, walay trabaho ug nagpuyo sa maong dapit.
Gituohang hubog si Lawas ug gipanghapos ngadto sa karsada ang basiyo sa botelya hinungdan nga nagpasad ang mga buak nga bildo samtang nagwara-wara sa gidala nga kutsilyo.
Ang mga sakop sa Special Weapon and Tactics (SWAT) Team nga gipangulohan ni Police Officer 3 Rejil Enriquez maoy dali nga nakatubag sa alarma.
Gipakalma nila ni Enriquez ug mga kauban ug gihinay-hinay sa pagkuha ang gidala nga kutsilyo sa suspek. Pasakaan sa tukmang kaso ang suspek. GMR (BANATNEWS)