CEBU, Philippines — Nagmalampuson ang gipahigayong nga community-based evacuation drill sa Barangay San Isidro, Dakbayan sa Talisay kagahapong adlawa.
Apan wala gyud kalikayi nga napalpak ang uban ilabi na ang pagkaguba sa sakyanan sa polis nga maoy nagsilbing niapil sa pagresponde.
Si Alvin Santillana, hepe sa City Disaster Risk Reduction and Management Office (CDRRMO), nagkanayon nga gihimo nila ang evacuation drill sa mga residente sa lugar nga flood prone area nga mga sitio ilabi na nga adunay bagyo.
Siya nibutyag nga maayo gyud ang performance sa taga Barangay San Isidro, kapolisan, kabomberuhan ug sa Talisay City District Hospital.
Gani iyang gihatag ang 95 porsiyento nga rating sa ilang performance nga nahuman sulod sa usa ka oras ug 15-minutos. Apan nabantayan kagahapon nga sa pagresponde sa kapolisan natanggong ang ubang sakyanan kay nitiurok ang patrol car. Gawas sa pagkaguba sa patrol car natanggong ang nagsunod nga mga sakyanan kay hagip-ot man kaayo ang agianan paingon sa evacuation center nga mao ang tunghaan sa San Isidro.
Si Kapitan Marietta “Yehyen” Bucao niingon nga kon hatagan og higayon mas maayo gyud nga padak-an ang karsada paingon sa ilang tunghaan aron mas paspas pa gyud ang pagresponde kon moigo ang katalagman.
Hinuon siya mapasalamaton nga nahimo nga malampuson ang ilang kalihukan ug adunay mga napupo nga mga pagtulun-an silang mga opisyal ingon man ang katawhan kon moigo ang dili maayo nga panghitabo. (BANAT NEWS)