CEBU, Philippines — Kinahanglang moesplikar sa Human Resource Development Office (HRDO) ang mga trabahante sa opisina sa Sangguniang Panlungsod nga wala nakaapil sa kinalit nga drug test sa Cebu City Office for Substance Abuse Prevention (COSAP) sa niaging Biyernes.
Adunay 186 sa 263 ka empleyado sa opisina sa bise mayor, legislative ug secretariat ang nakaapil sa kinalit nga drug test ug usa niini ang napositibo sa paggamit og ilegal nga drugas.
Matud sa pangulo sa COSAP, Garry Lao, nga ang napositibo mataktak bisan pa og kinahanglan pa kining mopaubos sa confirmatory test kay mao kini ang mando ni Mayor Tomas Osmeña.
Gipahinumduman sab ni Lao ang mga empleyado nga wala napaubos sa surprise drug test nga kinahanglan gyud nila nga mopaubos niini subay sa memorandum nga giisyu sa City Administrator’s Office.
Ang COSAP aduna nay 16 ka opisina nga napaubos og surprise drug test ug nalakip sab ang Bureau of Jail Management and Penology (BJMP).
Si Dioscaro Pagas, empleyado ubos sa SP secretariat, niingon nga maayo nga nagpahigayon og surprise drug test sa ilang opisina.
“Wala’y problema. Mas maayo noon para mahibaw-an kung naa bay positive or negative sa paggamit og illegal drugs,” matud ni Pagas. - Joyce Ann Gabutan, CNU Intern (BANAT NEWS)