Duha angol sa insidente sa bangga sa Danao

CEBU, Philippines – Magtiayon nalandig sa tambalanan human ang ilang gisakyang motorsiklo aksidenteng nabanggaan og auto nga gimaneho sa usa ka Korean national niadtong Biyernes sa hapon diha sa Barangay Dunggoan, dakbayan sa Danao.

Ang biktima giila nga sila si Johnrec Singson Maningo, 29-anyos ug asawa niini nga si Nochel, 26, mga residente sa Barangay Puente, Carmen, dakbayan sa Danao.

Ang Korean national giila nga si Jae Young Lee, 53-anyos, kasamtangang nagpuyo diha sa Villa Aurora, Barangay Kasambagan, dakbayan sa Sugbo nagmaneho sa Kia Spectra Sedan nga nagtangag sa plakang JEB-954.

Matud ni PO3 Joseph Paledon sa Danao City Police Station nga ang duha ka habig nagbiyahe sa susamang direksiyon paingon ngadto sa amihanan dihang kalit nga ni U-turn si Lee kinsa mopaingon unta ngadto sa usa ka golf course apan aksidente kining mibangga ngadto sa Honda nga motorsiklo nga dunay temporaryong plaka nga 070105 nga gisakyan sa  mga biktima.

Swerte tungod kay mga pangus lang sa lawas ang naangkon sa mga biktima ug dali kini gidala ngadto sa duol nga tambalanan.

Ang auto nga gimaneho ni Lee gitanggong kini diha sa Danao Police Station ug giingong ang Korean national mao ang manubag sa mga galastohan sa tambalanan sa mga biktima. (/BDB)(BANAT NEWS)

 

 

 

Show comments