CEBU, Philippines — Karon nga nagsingabot na ang campaign period, pangulo sa Commission on Elections sa Rehiyon-7 miendorso sa pagpahigayon og candidates’ forum o debate. Si acting COMELEC-Region 7 Director Atty. Veronico Petalcorin nagkanayon nga makahulogan kini nga higayon nga adunay lugar ang mga kandidato sa umaabot nga barangay ug Sangguniang Kabataan elections nga makapadayag sa ilang mga plataporma o agenda.
“Kami sa COMELEC-7, mo-encourage mi sa mga local election officers o kondili mga non-government organizations nga mo-organize og usa ka candidates’ forum,” matud ni Petalcorin sa mga reporters.
Ang campaign period modagan sugod karong Mayo 4 ngadto sa Mayo 12. Apan si Petalcorin miklaro nga desisyon lamang kini sa mga local election officers kon mopahigayon sila niini.
Dugang niya nga ang Comelec posible usab mo-coordinate o mo-partner sa mga non-government organizations o religious entities sama sa Cebu-Citizens Involvement and Maturation for Peoples Empowerment and Liberation (C-Cimpel) aron mo-facilitate o mo-sponsor sa maong kalihukan.
Sumala pa niya, angay mahibawo ang mga botante sa mga intensyon ug plano sa matag kandidato aron mas makahunahuna sila og kinsa ang ilang pilion nga angay molingkod sa posisyon.
Si Petalcorin miingon nga nindot kini nga oportunidad alang sa mga kandidato, kon independent lang kini o adunay partido.
Mipasabot siya nga maglisod sa pangampanya ang mga kandidato nga independente itandi sa mga adunay partido tungod kay mas dako ang kakuhaan nga suporta niini. -/IBM (BANAT NEWS)