CEBU, Philippines – Tulo ka mga bag-ong topnotchers sa pagka abogado karong tuiga ang nagagikan sa University of San Carlos dinhi sa dakbayan sa Sugbo.
Sila mao si 2nd placer Christianne Mae Balili- 90.80 percent; 4th Ivanne D'Laureil Hisoler- 89.55; 7th Rheland Servacio-89.
Si Balili dihang nahinabi sa mga tigbalita miangkon nga nagkurog gyud siya sa kahinam sa pagpaabot sa resulta ug dako iyang kakurat dihang gitawgan siya ug gipahibalo nga siya maoy top 2 sa maong pasulit sa Bar.
Matud niya dili lalim ang iyang gihimo aron kini makab-ot tungod kay full time siya nga nagtungha sa law ug full time usab siya nagtrabaho aron ikasuporta sa iyang tuition. Nahimo niyang inspirasyon ang iyang apohan nga namatay pipila ka adlaw sa dihang mokuha na siya sa bar.
Sama sa uban, nangandoy usab siya nga masulod sa top 10 apan wala siya magdahom nga matinuod kini ug ikaduha pa gyud. Mopauli una siya sa ilaha sa Zamboanga del Norte aron makig-uban sa iyang pamilya ug magselebrar.
Si Servacio sa iyang bahin nipadayag nga pangandoy sa iyang amahan nga mahimong abogado apan tungod kay nagtutuk kini sa ilang negosyo hinungdan nga siya ang nitiwas niini. Si Servacio mao ang labing unang abogado sa ilang pamilya.
Ang dean sa college of law sa USC Atty. Joan Largo miingon nga utang nila sa mga maayong mga magtutudlo, maayong mga estudyante, maayong tagdumala sa tunghaan ug maayong pasilidad ang matag kalamposan sa ilang mga estudyante.
Gitug-an ni Largo, 65 sa 70 nga nikuha og bar exams sa USC College of Law sa miaging tuig ang nakapasar. (/IBM)(BANAT NEWS)