May nervous breakdown naghikog
CEBU, Philippines — Patay na nga nadiskubrehan sulod sa lawak sa ilang panimalay ang 49-anyos nga lalaki sa Sitio Tapol, Barangay Santican, Dakbayan sa Danao alas 3 pasado sa niaging kaadlawon.
Si Senior Police Officer 1 Arnold Labine niila sa namatay nga si Jolito Perez, adunay kapuyo sa maong dapit.
Ang kapuyo sa namatay, Demetria Calzada, dali nga nangayo og panabang sa ilang mga silingan kinsa dali usab nga nakataho sa kapolisan.
Gitug-an sa kapuyo nga ang namatay adunay nervous breakdown ug gani makadaghan na kini nisuway sa paghikog apan napakgang.
Si Labine niingon nga ang pisi nga nylon maoy gihigot sa liog sa lalaki ug ang pikas tumoy didto gihigot sa ibabaw nga bahin dapit sa kisame. (Romeo T. Limpangog/GMR)
Seguridad sa piyesta sa Mandaue andam na
Gihan-ay na sa Mandaue City Police Office ang kahapsay ug kalinaw sa matag gabii ug adlaw nga kalihukan sa tinuig nga pangilin sa dakbayan sa Mayo 8.
Matud ni Senior Superintendent Roberto Alanas, director sa MCPO, nga sa paglusad sa kalihukan niadtong Abril 19 nga gitambungan ni Bise Mayor Carlo Fortuna, nipadala sab siya sa iyang mga opisyal sa pagpahibawo sa ilang pagpangandam.
Naglakip niini ang higpit nga pagbantay sa mga magtapok nga mga tawo nga mosaksi sa kalingawan sa Plaza Square sa City Hall diin nahimutang sab ang National Shrine of Saint Joseph.
Naglakip sa gipaabot nga magtapok ang daghang mga tawo sa pagladlad sa nagkadaiyang pagkaon gikan sa kabarangayan.
Naglakip na niini ang tagaktak, masareal ug ingon man ang bibingka sa Mandaue ug uban pa nga maoy nag-una nga paliton sa mamista gikan sa laing lugar.
Ang Miss Mandaue 2018 pagahimoon sa Mandaue City Sports and Cultural Complex diin gipaabot sab nga tapokan sa daghang mga tawo tungod sa mga artista nga manambong. (BANAT NEWS)
- Latest