CEBU, Philippines – Mokabat sa P12 milyones ang gigahin sa kagamhanan sa Dakbayan sa Mandaue alang sa mga kalihokan sa Mandaue Midyear Cultural Summit nga kabahin sa mga kalihokan sa tinuig nga pangilin sa patron sa dakbayan Senyor San Jose nga gikatakda karong Mayo 8 niining tuiga.
Matud pa ni City Treasurer Regal Oliva ang P10 milyones niini gamiton sa nagkalainlaing kalihokan ug ang P2 milyones alang usab sa mga paugnat sa kusog.
Niadtong Abril 19 ang mga opisyal sa dakbayan uban ni Bise Mayor Carlo Fortuna milusad sa Miss Mandaue 2018 uban sa Mandaue Gay Pageant pinaagi sa gihimong media presentation.
Ang Miss Mandaue 2018 gikatakda nga pagahimoon sa Mayo 6 sa gabii sa Mandaue City Sports and Cultural Complex ug sa Mayo 9 usab sa gabii pagahimoon ang Mandaue Gay Pageant anha gihapon sa maong dapit.
Hingpit usab nga buksan ang City Fiesta Olympics sa Abril 29 nga naglakip sa masaksihan nga mga duwa mao ang volleyball, basketball, tennis ug arnis.
Si Oliva miingon nga dunay mga bag-ong mga kalingawan sa koronasyon nga naglakip sa Palengke Queen ug Miss Gay Jurassic nga himoon sa April 29 ug May 5 niining tuiga. (/IBM)(BANAT NEWS)