CEBU, Philippines - Usa ka illegal refilling station sa mga butane canisters nga sudlan og Liquefied Petroleum Gas (LPG) sa sitio Cassanta, Barangay Mactan, dakbayan sa Lapu-Lapu ang gironda sa miaging hapon.
Matud pa nga mismo ang mga silingan sa maong ilegal nga refilling station ang misumbong sa mga otoridad tungod kay nabalaka sila nga makamugna kini og sunog sa ilang dapit.
Usa ka Bienvenido Estenzo Sohitado Jr., 30, ug Pernino Paquibot ang nadakpan sa kapolisan ug giingong maoy mga caretaker sa refillings station.
Naglakip sa mga nasakmit ang 58 ka 50 kilo nga tangke sa LPG, unom ka tangke sa 12.9 kg nga LPG tanks, 60 ka buok improvised refiller, 130 ka wieghing scales, 548 ka buok nga butane canister nga adunay mga sulod, 4,572 ka buok nga basiyo sa butane canisters, usa ka Suzuki nga motorsiklo ug uban pa.
Ang dinakpan pasakaan og kaso tungod sa paglapas sa Republic Act 9003. (/IBM)(BANAT NEWS)