CEBU, Philippines — Nangaangol sa pagpanigbas ang usa ka barangay konsehal ug ang pamilya niini human gisulong sa usa ka lalaki kinsa gituohang adunay kakulian sa pangisip sa Lamacan, Tominjao, Lungsod sa Tuburan niadtong Sabado sa gabii.
Ang hepe sa Tuburan Police Station, Supt. Melbert Glade Esguerra, niila sa mga biktima nga sila si Konsehal Armando Armodia, asawa nga si Rose Armodia ug ang anak nila nga si Gesel Armodia, hamtong na ang pangedaron.
Ang nanulong giila nga si Jerry Pakingan, hamtong nga nagpuyo sa Barangay Siotes sa maong lungsod.
Si Barangay Kapitan Wilfredo Gabilan ang nisumbong sa insidente hinungdan nga girespondehan apan wala na naabti ang suspek samtang gipangdala na sa tambalanan ang mga biktima.
Giingong sa likod nga pultahan niagi si Pakingan nga nagdala og bolo ug natigbasan ang mga biktima apan gitabangan kini og layog nilang Armando ug Gesel ug malampusong nailog ang bolo.
Gihigtan og pisi si Pakingan ug nagpakitabang ang mga biktima sa mga silingan apan giingong natumba si Pakingan ug napantok ang ulo sa bato.
Lakip sa gidala sa Tuburan District hospital si Pakingan apan gideklarar nga dead-on-arrival.
Hinoon matud ni Esguerra nga paladman pa nila ang imbestigasyon aron masuta kun wala bay foul play nga nahitabo.
“Atong i-invite nga moadto sa estasyon (silang Armodia) para part sa investigation,” sigun sa hepe.
Gitataw ni Esguerra nga way kalabotan sa umaabot eleksyon ang insidente sanglit gituohang adunay kakulian sa pangisip ang namatay ingon man dili taga Tominjao si Pakingan diin magpapili si Armando. (BANAT NEWS)