CEBU, Philippines — Mokabat sa P750,000 ang gibilin nga danyos sa naugdaw nga two-story residential house sa Sitio Riverside, Tingub, Dakbayan sa Mandaue. Nakaangkon sab og kadaut ang duha ka balay nga kasikbit ingon man ang bodega sa tupad niini.
Si Senior Fire Officer 1 Noel Codilla nga maoy field investigator sa kabomberohan sa dakbayan niingon nga ang sunog gialarma alas 8:01 kagahapon sa buntag.
Matud pa ang kayo nagsugod sa panimalay ni Matilde Cruz ug nitapon ngadto sa laing duha ka balay nga gipanag-iya nilang Pilipina Ceniza ug Cennon Remedio ug bodega nga gipanag-iya ni Doughlas Ong.
Si Codilla niingon nga tungod sa kakusog sa init sa panahon dali nilang gipaubos sa second alarm ang sunog hinungdan nga dali sab nga nitubag ang mga bombero sa kasikbit nga mga dapit.
Wala’y naangol atol sa maong hitabo ug sa pasiunang imbestigasyon nasuta nga electrical short circuit ang usa sa mga hinungdan sa kalit nga pag-ulbo sa kayo. (BANAT NEWS)