CEBU, Philippines - Ang Cebu Provincial Anti-Drug Office kon CPADAO maghuwat lamang sa “go signal” sa Department of Education kon kanus-a sugdan ang random drug testing sa mga estudyante sa sekondarya ug kolehiyo karong umaabot nga tingklase.
Matud pa ni Amaryllis R. Villarmia, Public Relations Officer sa Deped-7, adto pang Pebrero ning tuiga gihimo ang orientation sa DepEd kauban sa Drugs Board Regulation kabahin sa pagahimoon nga random drug testing sa mga estudyante sa mga publikong tunghaan.
Kauban sa misalmot mao ang mga nurses, health officers ug mga personnel nga malambigit sa maong programa.
“Most probably, it will be conducted within this school year but the specific dates, because it is a random drug testing and it’s confidential, dili gyud na siya mahibaw-an,” sigon ni Villarmia.
Matud niya ang CPADAO igo lang modumala sa maong aktibidad apan anaa ra gyud sa DepEd ang desisyon kung ila ba ning ipatuman.
“They will tap CPADAO for the conduct. Pag-facilitate ra man ato sa pag-conduct sa drug testing. Dili man kita maoy magpa implement. It’s their order man, it’s a DepEd order,” asoy ni Meca.
Gibutyag usab ni Meca nga “confidential” ang resulta sa drug test. (Caren Abing, CNU Interns/IBM)(BANAT NEWS)