CEBU, Philippines — Padayong nangandam ang Commission on Elections sa Siyudad sa Talisay sa piniliay sa Barangay ug Sangguniang Kabataan.
Kini bisan giaprobahan sa Ubos Bay-Balauranan ang balaudnon nga mag-oktaba na sab sa piniliay sa ikatulong higayon.
Si Atty. Gallardo Escobar, election officer sa Talisay, nibutyag nga gamay na lang ang tsansa nga maapas pa sa magbabalaud ang ilang tinguha nga makanselar na sab ang piniliay karong Mayo 14.
Kini tungod kay mag-recess na sila karong semanaha ingon man walay tugbang nga balaudnon ang Senado.
Tambag niya sa mga gustong magpapili nga molihok na sila sa pagpaila sa ilang kaugalingon.
Ang Comelec sa ilang bahin mahuman na sa printing sa listahan sa mga botante sa matag barangay.
Matud niya nga sa pipila ka barangay sa Talisay aduna’y mga barangay nga kusog na ang lihok sa politika diin nanghatag na og mga bugas, kwarta ug uban pa ang gustong magpapili.
Apan si Escobar niingon nga isip usa ka botante pilion gyud ang angay nga tawo nga palingkuron sa barangay kinsa aduna’y katakus sa pagpangalagad ug dili pulos lang pagpanghatag. (GMR) (BANAT NEWS)