Pusher namusil nakaipsot, laing usa sikop
CEBU, Philippines — Usa ka suspetsadong pusher ang namusil sa mga polis nga nagpahigayon og buy-bust operation apan swerte kay wala makabuto ang armas niini, insidente nahitabo kagahapon sa kadlawon diha sa Purok Anahaw, Barangay Magay, Lungsod sa Compostela.
Ang suspetsado giila sa mga polis nga si Jembon Natinga Getutua, 23, nagpuyo sa maong dapit ug nakaikyas kini
Si Senior Police Officer 3 Larry Enriquez sa Compostela Police Station nagkanayon nga ang suspetsado giingong nakamatikod kini nga polis ang mipalit kaniya hinungdang mihulbot sa iyang kalibre .22 nga magnum ug namusil ug maayo gani kay wala makabuto.
Ang suspetsado giingong nakahigayon og dagan ug wala na masikop sa mga polis.
Narekober sa mga polis diha sa lugar ang kalibre .22 nga pusil nga dunay upat ka bala, upat ka linikit nga marijuana ug usa ka paketeng shabu ug P200 nga marked money.
Sa laing bahin, nagtingkagol sa karsel ang suspetsadong pusher nga si Kenneth Corvera Belleza alyas “Borikat”, 36-anyos, ulitawo, residente sa Florida County, Barangay Dumlog, dakbayan sa Talisay human siya masikop sa gipahigayong buy-bust operation sa kapolisan niadtong Biyernes sa gabii.
Matud pa ni PO2 Raden Escanillan sa Talisay City Police Station nga nagsige na sila og kadawat og report kabahin sa ilegal nga kalihukan ni Belleza hinungdan nga nagpahigayon sila og buy-bust operation batok sa suspetsado.
Nasakmit sa mga polis gikan kang Belleza ang 10 ka gagmay’ng pakete sa shabu. (BDB) (BANAT NEWS)
- Latest
