CEBU, Philippines — Uyon ang Commission on Elections (COMELEC) sa tinguha sa Department of Interior and Local Government (DILG) nga mopagawas og giya sa pagpili sa mga kandidato sa Barangay ug Sangguniang Kabataan (SK) Elections.
Matud ni Atty. Lionel Marco Castillano, provincial election supervisor sa Sugbo, nga angayan ra nga ang mapili nga kandidato kahibawo sa trabaho.
Siya nagkanayon nga bisan sa niaging tuig, ang Comelec uban sa Provincial Women’s Commission (PWC) ug DILG ang nagpahigayon na og seminar sa kababayen-an diin usa sa mga speakers nagkanayon nga kinahanglang adunay igong kaalam sa position nga gidaganan.
“Kay ang uban ana, diha na mahibalo sa ilang trabaho inig lingkod,” matud ni Castillano.
Ang tigpamaba sa DILG nga si Jonathan Malaya nagkanayon nga ang “guide” maglista kini sa mga “qualities” nga angay sa usa ka opisyal sa barangay sama sa “sensibility, efficiency ug reliability”.
Matud ni Malaya nga ang ilang buhatan nag-andam kini og lista sa kalidad sa mga maayo nga lider sa barangay nga ilang ipanghatag isip giya sa mga botante sa pagpili aron paglikay nga masayang ang ilang boto. (BANAT NEWS)