CEBU, Philippines — Nagtinguha si Mandaue City Mayor Gabriel Luis “Luigi” Quisumbing sa pagrehistro sa tanang bouncer sa mga balay kalingawan sa dakbayan isip tubag sa mga taho nga ang guard on duty magtinabangay sa pagkulata sa mga kustomer.
Nunot niini giawhag ni Quisumbing si Bise Mayor Carlo Fortuna sa pagpalabang og ordinansa nga maoy basehan sa maong lakang.
Tuyo niini nga dali ra nga mailhan kung mahitabo nga adunay pagpamun-og ngadto sa kustomer.
Si Chief Inspector Genilo Veraque, hepe sa Presinto 2 sa Mandaue City Police Office ang nikompirmar labot sa labing daghan nga alarma sa nahitabong kagubot nga naglambigit sa kustomer ug mga guwardiya sa establisemento.
Usa sa gitumbok ang Club Hatchi sa Barangay Tipolo nga usa sa gipadad-an ni Quisumbing og show cause order tungod sa giingong pagpasiugda og kalingawan atol sa Sinulog nga walay permit. (BANAT NEWS)