CEBU, Philippines — Walay gitugutan nga maka-leave sa mga enforcers sa Traffic Enforcement Agency of Mandaue (TEAM) ugmang adlawa hangtud sa Sabado gawas lang sa mga emerhensiya.
Kini nunot sa pagpakatap kanila sa kadalanan sugod ugma atol sa Traslacion sa imahen sa Señor Sto. Niño ug Birhen sa Guadalupe gikan sa Basilica Minore del Santo Niño paingon sa National Shrine of Saint Joseph.
Si Glenn Antigua, pangulo sa TEAM, niingon nga ilang patambungon sa trabaho ang 100 nila ka traffic enforcers sa mga dalan sa A.S. Fortuna, M.C. Briones, A. del Rosario, Sotero B. Cabahug ingon man ang mga dalan nga nagpadulong sa National Shrine of Saint Joseph.
Matud ni Antigua nga human sa Traslacion magsunod ang street dancing sa Panagtagbo Festival sa alas 12 sa udto hangtud na kini mahuman pinaagi sa showdown nga pagahimoon sa walo ka clustered nga contingents.
Hinuon si Antigua niingon nga tabangan usab sila sa mga barangay tanod ug mga volunteer groups sa kadalanan. (BANAT NEWS)