CEBU, Philippines — Niabot na og 23 ka patay’ng lawas ang nakaplagan sa nagpadayong search and retrieval operations sa tulo ka lungsod sa probinsya sa Biliran nga gibundakan og kusog nga uwan dala sa bagyong Urduja nga nakapadahili sa yuta kaniadtong Sabado.
Ang kadagkoan sa Provincial Risk Reduction and Management Council sa Biliran mipahibalo nga gawas sa nangamatay, may 10 pa ka tawo nga nangaangol ug laing 26 nga wala pa makit-i ug gituohan nga kini nalubong nga buhi sa midahili nga lapok.
Ang mga dapit nga adunay pagdahili sa yuta nahimutang sa mga lungsod sa Caibiran, Almeria ug Naval. Didto sa Barangay Locsoon, lungsod sa Naval, pito ka lawas ang naugkat, apil ang duha ka bata.
Upat sab ka lawas, apil ang duha ka bata, naugkat sa midahili nga yuta sa Barangay Iyusan sa lungsod sa Almeria. Laing pito ka lawas ang naugkat usab sa laing landslide didto sa Barangay Cabibihan sa lungsod sa Caibiran, diin walo ka balay nga gitukod daplin sa sapa ang gibanlas human mahugno ang tampi. Sa maong dapit dunay kapin sa 10 ka tawo ang gideklarar nga “missing.”
Si Caibiran Mayor Eulalio Maderazo miingon nga adunay buhawi nga mibundak sa ilang lugar ug maoy nakaingon sa pagdahili sa yuta nga daplin sa bakilid ug natabonan ang dul-an sa 10 ka balay.
Ang uban sa mga nangamatay gibanlas sa tubig nga sagol lapok, ug upat ka lawas ang naugkat, apil ang duha ka bata. Padayon ang pagpangita sa ubang mga tawo nga giingong missing pa.
Ang pasiunang kadaot nga namugna sa bagyong Urduja didto sa probinsiya sa Biliran gibanabana nga moabot og P30 milyones. Apan gituohan nga mosaka pa ang kantidad sa kadaot kay gikataho nga nahugno ang Caraycay Bridge nga nagdugtong sa mga lungsod sa Naval ug Biliran.
Ang opisina ni Presidential Assistant for the Visayas Mike Dino nakigtambayayong dayon sa mga opisyal sa mga lungsod sa Biliran aron kahatagan dayon og tabang ang mga biktima sa Urduja didto sa maong probinsya.
Matud sa chief of staff ni Dino nga si Assistant Secretary Jonji Gonzales nga gitug-anan sila sa mayor sa Biliran nga nanginahanglan og suplay nga tubig ang katawhan sa iyang lungsod kay ang ilang mga atabay natabonan sa pagbaha og lapok.
Nakabiyahe na
Pipila ka pasahero nga natanggong sa mga pantalan ang nakabiyahe na padulong sa tagsa-tagsa nila ka mga isla ug sa paingon sa mainland Cebu.
Sumala ni Baltazar Tribunalo Jr, ang pangulo sa Provincial Disaster Risk Reduction and Management Office (PDRRMO) nga 151 ka lokal ug langyaw nga turista sa Malapascua ug 81 sa Sta. Fe ang nakabiyahe na kagahapon human mihatag ang Coast Guard og clearance nga makabiyahe na ang mga barko.
Matud ni Coast guard Commander Jerome Cayabyab nga gitugotan nila nga makabiyahe na ang ubang barko kagahapon sa udto paingon sa luwas nga destinasyon human nga gilibkas na sa PAGASA ang public storm signal sa ubang mga dapit sa Kabisay-an.
Matud ni Cayabyab nga gipanid-an nila ang laing bagyo nga pagatawgon og Vinta nga gituohang moabot dinhi sa nasud dili pa ang Pasko.
Ang kadagkoan sa PAGASA miingon nga anam-anam na nga mibiya ang bagyong Urduja ug mipaingon na kini sa kasadpang bahin sa nasud, apan ang katawhan nabalaka gihapon kay adunay laing bagyo nga talisulod na usab sa Philippine Area of Responsibility ug giingong mas kusog kini kay sa Urduja.
Gitan-aw ang kadaot
Samtang, nagpahigayon karon paghimo og post disaster assessment ang Cebu City Agriculture Department sa mga tanom sa mag-uuma sa mga barangay sa kabukiran sa siyudad sa Sugbo.
Matud ni City Agriculturist Apple Tribunalo nga nakadawat siya og report nga daghang mga tanom, sama sa saging, mais ug uban pa, nga nangabali tungod sa kusog nga hangin. Apan ang Cebu City Disaster Risk Reduction Management Office (CCDRRMO) wala makadawat og report nga adunay midahili nga yuta diha sa kabukiran sa dakbayan.
Si Konsehal Jerry Guardo, tsirman sa Committee on Infrastructure, miingon nga kon masuta nga adunay pamilya nga grabeng naapektohan sa bagyong Urduja, iyang irekomendar nga hatagan kini sa dakbayan og P20 mil nga hinabang. - Decemay P. Padilla, Le Phyllis F. Antojado (BANAT NEWS)