CEBU, Philippines — Usa ka negosyante og pan ang gironda sa kapolisan sa Sitio Ylaya, Barangay Panlipan, lungsod sa Catmon ug nasakmit ang klase-klaseng mga armas.
Ang search warrant pinirmahan ni judge Jerry Dicdican sa Regional Trial Court Branch 25 sa Dakbayan sa Danao batok ni Marlon Butanas, usa ka negosyante og pan.
Apan wala diha sa pagronda ang suspek apan ang gwardya niini sa iyang bakery nga si Ricardo Ramos, 43, kinsa naghupot sab og paltik nga armas maoy nasikop sa kapolisan.
Nadiskubrehan sab sa mga operatiba sa Provincial Intelligence Branch nga wala say lisensya sa pagkagwardya si Ramos ug samot nga walay license to carry firearms.
Nakuha gikan sa posesyon ni Ramos ang usa ka kalibre .45 nga armas ug adunay upat ka mga bala samtang sa dihang gihiling sa kapolisan ang panimalay ni Butanas, nakuha ang mga paltik nga KG9 submachine pistol, usa ka kalibre .22 nga rifle, usa ka FL .9mm lugger ug ingon man mga bala niini.
Matud pa sa hepe sa PIB nga si Superintendent Joie Pacito Yape Jr. nga nakadawat sila og sumbong gikan sa usa ka concerned citizen nga maggawas-gawas sa ilang balay si Butanas ug magpakita og armas.
Gibutyag ni Yape nga atol sa surveillance nila batok sa maong negosyante nakuhaan siya og hulagway nga nagsukbit og armas.
Apan kusganong gihimakak sa dinakpan nga si Ramos ang pasangil batok sa iyang agalon.
“Wala gyud ko nakakita ana niya nga nagdala-dala og armas. Kanang mga armas niya pinalit ra man sad na niya sa mga amigo niya nga namaligya. Maikog siya mobalibad ba,” si Ramos miingon.
Samtang ang gihuptan niyang kalibre .45 hinatag ra usab sa iyang amo aron bantayan ang bakery nga gipanag-iya niini.
“Nagplano na man to nga pa-isyuhan mi og lisensya pero naunhan man mi,” si Ramos miingon.
Matud pa ni Yape nga adunay dul-an 200 ka buok ka mga trabahante ang maong bakery diin magdagan kini 24-oras aron makahatud ngadto sa nagkadaiyang parte sa probinsya sa Sugbo.
Palawman pa sab ang imbestigasyon sa kapolisan kon unsay rason nga nanag-iya si Butanas og mga armas. Niining pagsuwat, matud pa pasakaan og kasong paghupot og mga ilegal nga armas ang duha.
Ang Deputy Provincial Director for Administration nga si Supt. Jaime Quiocho miawhag sa publiko nga dili na lang mamalit og mga paltik nga mga armas ug kon duna silay armas mas maayong ilaha kining itahan sa kapolisan. (BANAT NEWS)