CEBU, Philippines — Negatibo ang resulta sa gipahigayon nga drug test sa 524 ka mga empleyado gikan sa mga lungsod ug dakbayan sa Lalawigan sa Sugbo apil na ang buhatan sa Cebu Provincial Prosecutor’s Office.
Base sa resulta sa drug test nga gihimo sa Cebu Provincial Anti-Drug Abuse Office (CPADAO) gikan sa Nobyimbre 16 ngadto sa 23, lima ka lungsod ug dakbayan apil na ang buhatan ni Provincial Prosecutor Pepita Jane Petralba ang gi-drug test.
Niadtong Nobyimbre 16, 151 ka mga magtutudlo sa Dakbayan sa Danao apil na ang district office sa DepEd Danao City ang napaubos sa drug test.
Laing drug test gipahigayon sa Carcar City Jail alang sa 25 ka jail personnel niini. Niadtong Nobyimbre 20, 25 sab ka mga empleyado sa buhatan sa piskaliya ang gi-drug test.
Samtang sa Malabuyoc District Hospital, 72 ka mga empleyado sa maong tambalanan ang gisuta kun mogamit ba og ilegal nga drugas. Niadtong Nobyimbre 23, 159 ka mga empleyado sa munisipyo apil na ang mayor, bise mayor, mga konsehal ug opisyal sa barangay ang gi-drug test.
Matud ni Ivy Durano-Meca ang pangulo sa CPADAO nga nagnegatibo ang resulta sa tanang empleyado.
Dugang niya nga halos matag adlaw, anaa sa field ang iyang mga sakop bisan og Sabado ug Domingo aron sa pagpahigayon og drug test ngadto sa mga empleyado sa LGUs, police stations, eskwelahan ug tambalanan sa probinsya. Kini depende usab sa request sa mga local executive. (BANAT NEWS)