CEBU, Philippines — Gisugdan na sa kapolisan sa Dakbayan sa Talisay kon kinsa ang mga tawo nga aduna’y mga armas nga nagpuyo sa lugar.
Kini human nipagawas og kamanduan ang ilang ulohang buhatan aron malikay sa indiscriminate firing karong Pasko ug Bag-ong Tuig.
Matud ni Supt. Jason Villamater, hepe sa kapolisan sa Siyudad sa Talisay, nga ang kamanduan gisayo aron aduna pay panahon sa pagsusi kung kinsa ang mga tawo nga nagpuyo sa siyudad ang adunay rehistrado nga armas ingon man ang wala maka-renew.
Hinuon iyang gipasabot nga dili kini maoy basehan kon adunay pagpabuto sa armas sa siyudad nga ang mga natala nga adunay armas na dayon ang pasanginlan tungod kay adunay higayon nga ang mga kriminal gyud ang maghimo.
Iyang giangkon nga lisud subayon ang nga tawo nga magpabuto sa ilang armas ilabi na og wala’y bisan usa nga motestigo.
Sa iyang bahin paningkamutan nila nga unta wala’y mahitabo nga pagpabuto sa armas atol sa Pasko ug Bag-ong Tuig tungod kay peligro kini sa katawhan nga matugpahan sa saag nga bala. - /GMR) (BANAT NEWS)