CEBU, Philippines — Dili na gyud mausab ang desisyon ni Cebu City Mayor Tomas Osmeña sa pagkanselar sa cash assistance nga ihatag unta sa Cebu City Government sa Ormoc City ug Surigao Del Norte. Mao kini iyang tubag bahin sa suwat nga gipadala ni Ormoc City Mayor Richard Gomez alang sa rekonsiderasyon.
“I don’t like to use the word final basta it’s a close subject,” asoy ni Osmeña. Unod sa suwat ni Gomez ang Ormoc City nangayo og pasaylo sa kalangay sa pagkuha sa P10 million financial assistance sa siyudad sa Sugbo dungan sa pagbutyag nga dunay nahitabong ‘misunderstanding.’
“It is unfortunate that there seems to be a misunderstanding here. We do the rounds asking for assistance, and when able, we even personally go to the donor/s to express our thanks. If you think about it, it really does not make sense for the City of Ormoc to snub a donation, any donation for that matter, especially if it is given sincerely," tipik sa pamahayag ni Gomez sa Official Facebook page sa Ormoc City Government.
Ang mayor miingon nga ang siyudad nagsige og coordinate sa lokal nga kagamhanan sa Ormoc alang sa hinabang apan giingong wala’y tubag ingon man kalambuan nga nahitabo.
Tungod niini nakaingon ang mayor nga dili interesado ang Ormoc City sa donasyon sa Cebu City nga nagkantidad og P10 million.
Ang siyudad mohatag unta og donasyon sa maong duha ka lugar human sila naapektahan sa 6.0 magnitude nga linog sayo ning tuiga.
Samtang si Konsehal Raymond Garcia sa oposisyon miingon angay hinumduman sa mayor nga ang maong mga lugar wala pa gyud hingpit nga nakabangon sa katalagman nga miigo sa ilang lugar. (BANAT NEWS)