CEBU, Philippines — Naghimo karon og pakisusi ang mga sakop sa homicide section sa Lapu-Lapu City Police Office (LLCPO) labot sa kamatayon sa guwardiya sa Mactan Export Processing Zone (MEPZ) nga nagpuyo sa Barangay Pajo sa maong dakbayan.
Si Police Officer 3 Reynaldo Arradaza sa homicide section sa LLCPO niila sa namatay nga mao si Eloie Alana Talaber, 37-anyos.
Matud ni Arradaza nga off-duty hinoon ang maong guwardiya ug nadiskubrehan na lang kini sa iyang anak nga nagkulob sa sulod sa ilang lawak nga walay panimuot.
Dugang ni Arradaza nga dali kining gihatud ngadto sa tambalanan apan gideklarar kini sa mga doktor nga patay na.
Si Arradaza niingon nga dihang ilang gihiling ang kalawasan sa namatay wala sila makakita og mga timailhan sa samad pinusilan o dinunggaban.
Apan bisan pa man niini ilang gitambagan ang mga sakop sa pamilya sa namatay nga ipaubos kini sa autopsy sa pagsuta sa hinungdan sa kamatayon. -/GMR (BANAT NEWS)