CEBU, Philippines — Prayoridad sa Probinsiya sa Sugbo sunod tuig ang pag-upgrade sa upat ka provincial hospitals sa Dakbayan sa Carcar, Danao, Bogo ug Lungsod sa Balamban.
Kini nunot sa gipangayo nga P1.1 bilyones nga pundo alang sa hospital operations sa tuig 2018.
Ang maong pundo kung aprobahan sa Provincial Board doble kini sa kasamtangang pundo sa mga tambalanan nga P472 milyones karong tuiga.
Si Dr. Rene Catan, hepe sa Provincial Health Office, una na nga nibutyag nga ang iyang orihinal nga gipangayo alang sa operasyon sa mga hospital moabot sa P2 bilyones.
Apan matud niya nga daghan na ang ilang mahimo sa kapin usa ka bilyon nga pundo sunod tuig.
Si Catan nagkanayon nga ilang prayoridad sunod tuig ang pag-upgrade sa mga tambalanan ilabi na sa mga provincial hospitals aron mahimo nga medical centers.
“Ang rason ana ang service delivery sa tertiary level care which is ang daghan gyud nga clamor sa kaigsoonan nga dili na sila padaganon sa siyudad aron matambalan,” matud ni Catan.
Tinguha sa Kapitolyo nga mopalit og mga ekipo alang sa mga tambalanan sama sa upat ka dialysis machines ug ingon man pagpalambo pa sa pasilidad ug pag-hire og dugang mga personnel.
“Mag-hire og daghan nga doctors aron kining mga espesyalista available na sa atong mga hospitals didto sa probinsiya,” matud ni Catan.
Apil sa ilang tutukan sunod tuig mao ang pagpalambo pa sa kapabilidad sa mga tambalanan nga maka-produce og dugo.
“I-align sa DOH sa Regional Blood Coordinating Council ug sa Province (of Cebu) nga we have to make sure nga ang necessary volume of blood of the province is always available,” matud ni Catan. (BANAT NEWS)