CEBU, Philippines — Dili mominus sa 5,866 ka tonelada sa basura nga nagtapok sa EVO Enviro Solutions Inc., usa ka private-owned transfer station sa Barangay Inayawan ang nahakot na sa Jomara Konstrukct Inc.
Kini maoy gibutyag sa pangulo sa Department of Public Services sa Dakbayan sa Sugbo, Roberto Cabarrubias.
Dunay 11,000 tonelado nga karaang basura ang napundo sa transfer station sanglit naundang ang paghakot gikan sa Jomara paingon sa Pasajero Motors Corporation sa nilabay nga kontrata.
Nagtipun-og ang basura tungod kay wala’y hauling operation nga nahitabo sulod sa 19 ka adlaw.
Niadtong Mayo 24 ang kontrata sa Jomara sa siyudad natapos ug ang Pamocor nipuli niadtong Hunyo 6.
Matud ni Cabarrubias nga ang Jomara nga maoy kasamtangang service provider sa siyudad nihakot sa basura depende sa kondisyon sa panahon.
Masaligon si Cabarrubias nga hingpit nga mahakot sa Jomara ang nagpabilin nga 5,133 tonelado sa karaang basura sa EVO transfer station sulod sa usa ka buwan.
Ang chairman sa committee on public services, Konsehal Eugenio Gabuya Jr., niingon nga apil sa kasamtangang kontrata sa Jomara ang paghakot sa tonelada sa mga karaang basura.
Sa kasamtangang kontrata sa Jomara nga P124 milyones gikan sa buwan sa Septiyembre hangtud na sa Disyembre karong tuiga, wala na nila gamita ang EVO transfer station gumikan sa environmental violations.
Niadtong Hunyo, ang Environmental Management Bureau-7 nihimo og inspeksiyon sa transfer station ug nakita ang mga environmental violations.
Tungod kay gisugdan sa Jomara ang ilang kontrata niadtong Septiyembre, ang gigamit nila karon mao ang Rustom Ignacio’s private-owned transfer station nga nahimutang lang gihapon sa Barangay Inawayan. (BANAT NEWS)