CEBU, Philippines — Kasumaran sa ikaupat ka tuig human sa pagtay-og sa 7.2 magnitude nga linog sa Kabisay-an, ilabi na sa Bohol ug Sugbo niadtong Domingo, kagahapon dinhi sa Dakbayan sa Sugbo gihimo ang 53rd Annual Session sa Coordinating Committee for Geoscience Programmers in East and Southeast Asia, diin mismo si Department of Environment and Natural Resources Secretary Roy Cimatu ang nangulo niini.
Buot masuta sa mga sakop sa CCOP nga gikan sa nagkalain-laing nasud kun giunsa pagbangon ug ang mga gihimong dugang precautionary measures human sa pagtay-og sa maong linog nga gisundan usab sa Super Typhoon Yolanda. Ang CCOP gilangkoban sa 14 ka mga sakop nga nasud sa Cambodia, China, Indonesia, Japan, Lao PDR, Korea, Papua New Guinea, Myanmar, Thailand, Singapore, Pilipinas ug Timor-Leste Vietnam, diin gisuportahan sila sa mga nasud gikan sa European Countries.
Katuyoan niini mao ang pagbinayloay og mga kasinatian ilabi na may labot sa linog, mga natural kalamidad sama sa pagdahili sa yuta aron kapugngan ang mga kadaut nga mahitabo kung mobalik ang susamang katalagman.
Ang kalihukan sa CCOP himoon dinhi sa Sugbo sulod sa tulo ka adlaw ug sa lalawigan sa Bohol ang laing duha ka adlaw. (BANAT NEWS)