CEBU, Philippines — Wala mopatim-aw atol sa ilang regular session kagahapon Oktubre 3 ang mga konsehal nga sakop sa Barug Team Rama isip pagpakita matud pa sa ilang protesta kalabot sa nahitabo sa miaging session kang Association of Barangay Council ug Tisa Barangay Captain Philip Zafra nga ilang kaalyado.
Dihang sugdan na unta ang regular session ang Secretary sa Sangguniang Panlungsod mipahibawo kang Vice Mayor Edgardo Labella nga maoy presiding officer nga aduna siya’y nadawat nga suwat nga pinirmahan sa mga konsehal sa Barug Team Rama.
Unod sa suwat sa mga konsehal ang pagpahibawo kang Labella sa ilang intensiyon nga dili mo-attend sa regular session kagahapon.
Protesta kini sa giingong tataw nga walay pagrespeto ni Cebu City Mayor Tomas Osmeña ug mga konsehal nga kaalyado sa mayor sa Bando Osmeña Pundok Kauswagan (BOPK) kang Zafra isip sakop sa konseho.
“During last regular session of this Sanggunian, Hon. Sisinio Andales in his privilege speech callously called for resignation of Hon. Zafra as ex-officio member of the Sanggunian. Member Andales was persistent to move for Member Zafra’s removable despite the clear provision of law and jurisprudence and the DILG’s deference to the decision of the Liga ng mga Barangay-National Executive Board that allows ABC Presidents to remain as ex-officio member of their respective sanggunians until elections have been conducted,” tipik sa suwat sa mga konsehal.
Lakip usab sa ilang punto mao ang giingong pag-angkon ni Osmeña nga ang gihimo ni Andales usa sa ilang paagi aron makuha ang mayoriya sa konseho.
Giklaro hinuon nila nga ang maong protesta wala nagpasabot nga ilang giabandonar ang ilang trabaho isip tingog sa mga Sugbuanon.
Nunot niini, si Labella mimando og recess sa sesyon aron matuki ang maong hitabo.
Paglabay sa pila ka minutos mibalik siya ug gihisgutan nila kun pila ang gikinahanglan ihap kun maka-kurom ang konseho ug bisan dili kompleto apan gipadayon nila ang ilang session.
Ang mga wa mitambong mao sila si Konsehal Joel Garganera, Raymond Garcia, James Anthony Cuenco, Jose Daluz III, Joy Pesquera, Edu Rama, Pastor ‘Jun’ Alcover ug Philip Zafra. (BANAT NEWS)