CEBU, Philippines — Usa ka Japanese national ang gidakop kay nasakpang naghithit og marijuana diha sa Fuente Osmeña Circle, Dakbayan sa Sugbo niadtong Biyernes sa gabii.
Ang maong dinakpan giila nga si Mitsuru Yoshida, 61, residente sa Kangawa, Japan ug temporaryong nagpuyo sa usa sa mga hotels sa Dakbyan sa Sugbo.
Matud pa ni PO1 Alfeben Lendio nga nasakpan sa mga nag-roving nga Drug Enforcement Unit sa Police Station 2 ang maong langyaw nga naghithit og marijuana nga sigarilyo hinungdan nga dali kining gidakop.
Butyag pa sa maong polis nga nakabantay unta ang suspek ug daling nilabay sa upos nga marijuana apan nakit-an siya ug dihang dakpon na kini, miaksyon kini og lihay apan wala gihapon makaikyas.
Nakuha gikan sa maong langyaw ang usa ka rolyo sa nagamit na nga marijuana ug tulo ka lain pang linikit.
Pasakaan kini og kasong paggamit og ilegal nga droga karong adlawa. (BANAT NEWS)