CEBU, Philippines — Napalgang patay ang managkapuyo sulod sa giabangang balay sa Sitio Maracas, Barangay Lahug, Dakbayan sa Sugbo kagahapon.
Ang duha giila nga silang Pruana Lombrado Apoli, 48, lumad nga taga Macrohon, Southern Leyte ug si Jerson Lawas, 29, taga Dakbayan sa Carcar, ang duha giingong nagsugod na og kadugta ug nadiskubrehan ang ilang mga lawas human nangita ang mga sakop sa babaye.
Ang mga imbestigador sa Homicide Section sa Cebu City Police Office nga gipangulohan sa imbestigador nga si PO3 Jeffrey Gutual miingon nga naligo sa kaugalingong dugo ang lawas ni Apoli didto sa ilang kusina.
Aduna kini samad dinunggaban samtang atoa sa kwarto si Lawas kinsa nakaangkon og samad pinusilan sa iyang agtang. Adunay kitchen knife nga nakita tapad sa patay’ng lawas ni Apoli samtang kalibre .22 ang gigunitan ni Lawas.
Matud pa sa maong imbestigador nga natingala ang mga empleyado sa negosyo ni Apoli sa usa ka mall nga wala na kini nagmonitor kanila sugod niadtong Sabado hinungdan nga ila kining gisusi sa ilang gipuy-an.
Apan matud pa nga sirado ang tibuok balay niini hinungdan nga nagpatabang sila sa kapolisan. Butyag ni Gutual nga wala mialingasaw ang baho sa maong mga patay tungod kay selyado kaayo ang balay.
Sa ilang inisyal nga imbestigasyon nasuta nga sige og away ang duha tungod sa kaselosa ni Lombrado.
Gani, niadtong Biyernes nasaksihan sa mga silinganan nga nag-away ang duha kay wala mananghid si Lawas nga magyabo og tubig sa gawas, matud pa ni Gutual.
Upat pa lang ka buwan nag-ipon ang duha sa maong lugar.
Sumpay ni Gutual nga pagka-Sabado sa kaadlawon niana, nakadungog og siyagit ang mga silingan apan wala na lang nila kini panumbalinga tungod kay kausa ra kini ug wala sab nagpakitabang.
Pangagpas sa maong imbestigador nga gidunggab ni Lawas si Apoli usa kini nagpakamatay.
Aduna sila’y nakitang tunob sa tiil agi sa dugo ni Apoli paingon sa pultahan ug balik sa kwarto diin napalgang patay si Lawas. Gituohan usab nga nakainom si Lawas tungod sa nakitang botelya sa beer sa tupad niini.
Ipaubos og paraffin test ang duha aron masuta kon kinsa kanila ang nipabuto sa pusil human madiskobrehan nga gipanag-iya ni Apoli ang maong armas. (BANAT NEWS)