CEBU, Philippines — Aron malimpyohan ang prisohan, gipaubos sa kinalit nga drug test ang mga kawani sa Cebu Provincial Detention and Rehabilitation Center (CPDRC) kagahapon sa buntag.
Niabot sa 93 ka mga kawani sa CPDRC ang gipaubos og drug test sa Cebu Provincial Anti-Drug Abuse Office (CPADAO) nga naglakip sa mga jail guard, admin staff ug utility personnel. Bisan ang mga gwardiya gikan sa security provider sa Kapitolyo gipaapil og drug test.
Matud ni Audesti Miguel, ang assistant jail warden, nga base sa lagda sa Civil Service Commission, angay gyud nga limpyo gikan sa ilegal nga drugas ang mga nagtrabaho sa gobiyerno. “Not only because it’s a requirement, but it is simply because it is something that we civil servants should be, an epitome of clean living, of being servants of the people and be able to uphold public service in the interest of justice,” matud pa ni Miguel.
Nasayran nga dili tanang kawani sa CPDRC ang napaubos sa drug test kay ang uban nag-day off kagahapon. Gipahibawo ni Miguel nga ang maong mga empleyado aduna pay panahon nga makapa-drug test.
Ang maong drug test subay usab kini sa paglimpyo sa sulod sa prisohan human nga pipila ka mga jail personnel ang nalambigit sa pagpalusot og ilegal nga drugas ug mga kontrabando sa sulod.
Sa pagsulat niining balita, wala pay nahatag nga resulta ang CPADAO sa ilang gihimo nga drug test. - /DILT) (BANAT NEWS)