CEBU, Philippines — Gisubay sa kapolisan ang anggulo nga may kalabutan sa mga trabaho ug pagkahimo niining politiko ang motibo sa pag-ambush kang Atty. Reynante Dela Cerna,42, niadtong Miyerkules sa gabii diha sa Sitio Cadauhan, Barangay Talamban niining Dakbayan sa Sugbo.
Ang maong abogado mao usab ang First Councilor sa Tuburan nakaangkon og upat ka mga samad pinusilan human kini gipusil sa duha ka wa pa mailhing lalaking nagtaptap sa ilang mga nawong ug nagsakay og motorsiklo pipila lang ka metros gikan sa ilang panimalay.
Napagan sab ang driver sa habal-habal nga iyang gisakyan nga si Romel Mante. Swerte na lang nga wa maigo ang 6- anyos nga anak ni Mante nga iyang gikuyog kay ipahilot.
Ang hepe sa Cebu City Police Office nga si Senior Insp. Joel Doria nagbutang og mga polis sa tambalanan nga gidad-an kang Dela Cerna tungod kay nagduda sila nga nakaila ang mga mamumuno sa biktima.
Si Senior Police Office 1 Winston Ybañez sa Homicide Section sa CCPO miasoy nga nagpahatod si Dela Cerna sa iyang asawa ngadto sa Talamban Proper aron ikakita ang iyang kliyente ug misakay kini og habal-habal nga gimaneho ni Mante sa iyang pagpauli.
Matud pa sa imbestigador nakabantay daan si Dela Cerna nga adunay motor nga nisunod kanila ug nalingian usab niya ang akto pagpusil kaniya sa backrider sa nagsunod nga motor.
Apil sa gisubay sa kapolisan kun aduna bay kalambigitan sa politika ang pagbanhig kang Dela Cerna. Niining pagsuwat sa balita luwas na ang kahimtang sa abogado. (BANAT NEWS)