CEBU, Philippines - Gikondenar sa mga opisyal sa Lalawigan sa Sugbo ang pagpatay sa 17-anyos nga batan-on didto sa Caloocan City sa niaging semana.
Si Gobernador Hilario Davide III nihulagway nga “tragic” ang gidangatan ni Kian Lloyd delos Santos kinsa giingong gipatay sa dili moubos tulo ka polis atol sa ilang operasyon.
“I think sobra ra pud tingale to, kinahanglan gyud na imbestigaran,” matud ni Davide.
Siya nidugang nga kinahanglang atubangon ug manubag ang responsable ug nanghinaut nga dili kini mahitabo sa Sugbo.
Si Bise Gobernador Agnes Magpale, kinsa usa ka child welfare advocate, nalipay sa pagkondenar sab ni Presidente Rodrigo Duterte sa maong insidente.
Matud ni Magpale nga sakit alang kanilang mga child welfare advocates nga gipatay ang usa ka batan-on nga naghunahuna sa iyang kaugmaon.
“I heard of one of interviews that the boy pleaded sa iyang attacker, niingon pa gani siya nga ayaw ko patya kay duna pa koy exam. How he valued education no, meaning to say, if at all he was indeed into drugs he was willing to reform, although I doubt that angle of the story,” matud ni Magpale. (BANAT NEWS)