CEBU, Philippines - Gisakmit sa Cebu Provincial Anti-Illegal Fishing Task Force ang 14 ka kahon sa pinabuthang isda sa Magay, Compostela niadtong Martes sa buntag.
Matud ni Rey Lyndon Ruiz, pangulo sa task force, nga usa ka truck nga adunay plate number JDR154 ang nagkarga sa maong mga isda ang ilang gidakop atol sa checkpoint.
Positibo sab nga pinabuthan ang maong mga isda human kini gisusi sa fish examiner diin nasuta nga nadaut na ang internal organs sa mga isda.
Si Ruiz nagkanayon nga moabot ngadto sa 50 ngadto sa 60 kilos sa isdang tuloy matag kahon ang ilang nasakmit nga mobalor og P60 mil kung ibaligya kini sa tag P70 ngadto sa P80 matag kilo sa merkado.
Matud ni Ruiz nga gikan sa Barangay Mahawak, Medellin ang maong mga isda.
Si Ruiz nagkanayon nga ilang nabantayan nga ang mga ilegal nga mananagat nakabantay na sa oras o pattern sa ilang operasyon.
“Sa una kadlawon, karon nagbag-o na sila og modus, buntag na sila. So mao na ang atong gi-anticipate,” matud ni Ruiz.
Nasagmuyo si Ruiz sanglit bag-ohay pa lang siya nibisita sa Medellin aron sa pakighinabi sa mga mananagat ug opisyal sa barangay nga motabang batok sa ilegal nga panagat.
Ang mga pinabuthang isda gihatag kini sa Kapitolyo ngadto sa Cebu Provincial Detention and Rehabilitation Center (CPDRC) ug sa ubang orphanage ug foundation samtang ang truck gikustodiya sa task force sa Capitol compound. (BANAT NEWS)