CEBU, Philippines - Walay magtutudlo ang nalakip sa mga persons of interest sa nahitabong bomb scare sa unom ka mga pampublikong eskuylahan niadtong July 18, Martes matud pa sa direktor sa Cebu City Police Office nga si Joel Doria.
Kini human anam-anam nang nasubay sa mga sakop sa Anti-cybercrime Unit ang lokasyon sa maong suspetsado nga giingong nia pa gihapon sa Sugbo.
“Meron tayong nakita. Pero kasi technical.. isinubmit na natin yun sa Cyber Crime Unit.. binigay na natin lahat ng info.. kung hanggang saan ang investigation..” Si Doria mingon.
Apan matud pa nga gikinahanglan lang gihapong pamatud-an sa maestra sa Ilagan City, Isabela nga si Karen Mae Calautit, kinsa gikatahong tag-iya sa numero nga maoy gigamit sa pagpanghulga sa maong mga tunghaan nga dili na siya ang tiggamitan sa maong numero.
Ang maong pagpanghulga klaro kaayo nga binuang ra, si Doria midugang.
Kahinumdoman nga nagkaguliyang ang mga estudyante, maestra ug mga ginikanan sa Mabolo National High School, Lahug Elementary School, Carlos A. Gothong Memorial National High School, City Central School, San Nicolas Elementary School, Zapatera Elementary School ug Labangon Elementary School human nga gitawagan sila sa maong numero nga dunay bomba sulod sa tunghaan.
Ang kapolisan nakig-alayon na sa mga telecommunications company sa Sugbo alang sa pagpalawom sa maong imbestigasyon aron masubay ang suspetsado. (BANAT NEWS)