CEBU, Philippines - Buot sa kagamhanan sa Dakbayan sa Mandaue nga himoon na nga pribado ang pagpangolekta sa basura sunod tuig. Matud ni Mayor Gabriel Luis "Luigi" Quisumbing nga mas makadaginot ang siyudad ug dili na kinahanglan nga mamalit ang kagamhanan og mga dumptrucks ingon man gasto sa krudo ug maintenance niini.
"It will be the city who shall pay for the collection of garbage not the residents who shall be paying for it," dugang sa mayor.
Si Bise Mayor Carlo Pontico Fortuna nagkanayon nga ang siyudad mokolekta og 240 ka tonelada nga basura matag adlaw.
Hinoon sa pagkakaron wala pa sila nakapasar og usa ka ordinansa nga himoon na nga pribado ang pagpangolekta sa basura.
Ang siyudad dugay ra nga nagdili sa mga establisemento sa paggamit og plastik aron sa pagkunhod sa gidaghanon sa basura ug ingon man sa pagsulbad sa problema sa baha kay ang mga plastik mao man ang kasagaran nga mobara sa mga agianan sa tubig-baha. - /GMR) (BANAT NEWS)