CEBU, Philippines - Giaprubahan ni Cebu City Mayor Tomas Osmeña kagahapon ang rekomendasyon sa pangulo sa Department of Public Services (DPS), Engr. Roberto Cabarubias, sa pagtagana og P10.2 milyones hinabang sa Ormoc City.
Ang Probinsiya sa Leyte gitay-og og 6.5 magnitude nga linog diin usa ang Siyudad sa Ormoc nga nakaangkon og dakong kadaut sa maong hitabo.
Gipadala ni Osmeña sa Ormoc ang iyang consultant nga si kanhi konsehal Alvin Dizon ingon man si Cabarubias aron pag-assess sa panginahanglan.
Nagkanayon si Cabarubias nga niabot sa P10.2 milyones ang ihatag nga hinabang human nasuta nga dunay mga water pumping stations sa Ormoc ang wala magamit tungod kay walay generator sets.
Dugang sa opisyal nga human makakuha sa gikinahanglan nga data, nag-canvass sila og mga generator sets.
Nirekomendar usab kini nga butangan og concrete structure ang matag generators ug giapil na ang budget alang niini ug sa mga kable. Mangayo pa og request si Cabarubias sa pangulo sa Cebu City Disaster Risk Reduction and Management Office, Nagiel Bañacia, aron adto kuhaon sa disaster funds ang pundo.
Sigun ni Cabarubias nga iyang hangyuon si Konsehal Margarita Osmeña aron mo-sponsor og resolusyon alang sa pagtugot sa konseho.
Kun mahan-ay na ang tanan, si Osmeña mismo maoy moadto sa Ormoc City ug motunol sa hinabang pinansiyal.
Gipasabot ni Cabarubias nga kwarta ang ihatag sa siyudad sanglit kun ang dakbayan pa ang mopalit og generator sets, moagi pa kini og taas nga proseso.
Posible nga sa sunod semana pa matuki sa konseho ang maong tinguha nga paghatag og ayuda sa Ormoc City ug malaumon si Cabarubias nga aprubahan kini sa konseho. (BANAT NEWS)