CEBU, Philippines - Gihimo nga pilot areas ang lima ka barangay sa Lapu-Lapu City alang sa pagpurga sa mga pre-schoolers sa tanang day care centers sa tibuok Pilipinas.
Una kining higayon nga gihimo sulod sa 10 na katuig nga War on Worms o Gubat Batok sa Bitok sa Department of Health diin alang lang sa mga public elementary ug high schools.
Kagahapon adunay 1,543 pre-schoolers sa Barangay Ibo, Bankal, Basak, Buaya ug Pusok ang gipangpurga.
Si Dr. Vicente Belizario, Jr., professor sa University of the Philippines (Department of Parasitology, College of Public Health), nagkanayon nga Enero sunod tuig nag-target sila nga 15,000 ka pre-schoolers sa Lapu-Lapu City ug sa Probinsiya sa Sugbo ang mapurga.
Ang maong kalihukan gihimo ubanan sa Mactan-Cebu International Airport isip kabahin sa ilang corporate social responsibility, ang UP Manila Department of Parasitology ug DOH.
Ang luwas ug epektibo nga pangpurga nga tabletas ang libre nga gipanghatag sa DOH nga mopahigayon og purga kaduha (Enero ug Hulyo) sa usa ka tuig.
Matud ni Al Patrick Alajas, coordinator sa Integrated Helminth Program sa DOH-7, nga ang batang bitokon kay pirme lang kapuyon, dili katubo o putot ug dili maayo og performance sa tunghaan. (BANAT NEWS)