CEBU, Philippines - Gidunggab patay ang 48-anyos nga lalaki sa iyang kaduwa og basketball human sila nagkasumpaki sa Ilihan, Dakbayan sa Toledo niadtong Domingo sa gabii.
Ang biktima giila nga si Danilo Prajes Romanillo, taga Calubihan II, Barangay Ilihan, samtang ang suspek giila nga si Jonel Mercader De Luna, 21-anyos, residente ra sab sa maong dapit.
Matud ni PO3 Bombino Enriquez nga nagkasumpaki ang biktima ug ang suspek sa pusta sa duwa.
Dihang niuli na sa balay ang biktima, giadto pa siya sa suspek dayon gidunggab lima ka higayon gamit ang siyam ka pulgadas nga kutsilyo.
Dali nga gidala sa tambalanan ang biktima kinsa nakaangkon og samad dinunggaban sa iyang tiyan ug pipila sa iyang buko-buko apan gideklarar kini nga dead-on-arrival.
Matud ni Enriquez nga una nilang gidakop ang maguwang sa suspek nga si John Vincent Mercader De Luna, 28, tungod kay matud pa nasigpatan sa usa ka saksi nga nidagan sab pahilayo human sa hitabo maong napasanginlan nga maoy nihimo sa krimen.
“Person of interest man sad siya ato orasa. Nipalit ra diay to siya og sigarilyo sa tindahan nga duol ra sad sa balay sa biktima kay silingan ra lagi na sila unya kay pagdagan sa iyang manghud human sa krimen, nidagan man pud ni siya sa opposite direction,” matud ni Enriquez.
Apan gibuhian ra kini dayon human nasuta nga inosente samtang nisurender sa kapolisan ang manghud kinsa nagpakuha sa Dakbayan sa Naga.
“Ang tagtungod sa suspek ang nitawag nga naa siya sa Naga mo-surrender,” matud ni Enriquez.
Gipasakaan na og kasong murder si Jonel samtang gipagawas na ang maguwang niini.
(BANAT NEWS)