CEBU, Philippines - Mokabat kapin P1.3 milyon nga kantidad sa shabu ang nasakmit atol sa duha ka managlahing buy-bust operation sa Barangay Mambaling ug Barangay Calamba ning siyudad sa Sugbo kagahapon samtang usa ka High Value Target sa dakbayan sa Carcar ang nadakpan pinasikad sa Warrant of Arrest.
Sayo sa alas 5:30 sa kaadlawon gironda sa mga sakop sa Philippine Drug Enforcement Agency Regional Office-7 ang Alaska-Mambaling Proper, Barangay Mambaling ug nasikop ang subject nga si Jose Regan Abayan,31, ug naapil ang mga kauban niyang sila si Steve Villeno, 29, Michelle Villeno 26, Margie Villeno, 48, ug si Cyril Jamar, 26.
Nakuha sa maong grupo ang usa ka plastic nga adunay sud nga lima ka gramong shabu ug laing 19 ka paketeng gidudahang shabu nga mobalor na og P840 mil.
Sunod nga gironda mao ang usa ka drug den sa A. Lopez St., Barangay Calamba ug nasikop si Mary Grace Cuizon 25, Josue Jaca, 41, Jennifer Jaca, 38, ug Crisaldo Laurencian, 33, Ian Banzon ,20, ug Eugene Escarlan, 45. Nakompiska sa maong grupo balor P504 mil nga gidudahang shabu.
Samtang usa ka High Value Target sa dakbayan sa Carcar ang nasikop pinasikad sa warrant of arrest sa Barangay Valencia kagahapon sa buntag.
Ang gidakop mao si Elendio Pansit alyas Dindo, 37, kauban ang iyang kakunsabo nga si Michael Saraum, 35, lumad nga taga Saragosa, Aloguinsan.
Nasakmit gikan sa duha ang unom ka gamay’ng pakete sa shabu, duha ka medium nga pakete ug napulo ka pakete nga dunay sud nga gidudahang shabu nga mokabat na og dul-an P50 mil.
Samtang napulo ka mga nalambigit sa ilegal nga drugas ang nadakpan ug usa ka 10-anyos nga batang drug runner ang naluwas sa managlahing operasyon batok sa ilegal nga drugas diha sa Lapu-Lapu City ug Mandaue City.
Ang hepe sa Presinto 5 sa MCPO nga si Chief Inspector Wilbert Parilla maoy nangulo sa buy-bust operation sa Sitio Calipay, Barangay Opao ug nadakpan si Javencel Ciano, 22, taga Barangay Carreta, Dakbayan sa Sugbo.
Apil sa gidakop ang duha niya ka mga kauban nga sila si Glendel Romeo, 49, ug Bely Jame Setenta, 37, ug ilang giluwas ang 10-anyos nga batang lalaki nga gihimong runner sa maong grupo.
Nasakmit gikan sa maong mga dinakpan ang unom ka paketeng shabu, usa ka medium size nga ug P200 nga marked money. Samtang sa Dakbayan sa Lapu-Lapu nadakpan ang upat ka durugista nga nakuhaan og pinaketeng shabu.
Sa Barangay Lagtang, Dakbayan sa Talisay gidakop diha sa iyang balay si Manuel Cabuenas alyas Awing, 50, kansang balay naa ra sa duol sa barangay hall tungod sa pagpamaligya og shabu. Nakuhaan siya og tulo ka armas ug daghang shabu ug drug paraphernalia. Apil sa gidakop iyang batabata nga si Sanny Alcantara, 33.
Samtang laing durugista sab ang nasikop sa Sitio Rattan, Barangay Tanke, nga si Raulito Pairat Jr., 29. Samtang menor de edad ug duha ka lalaki ang nadakpan sa Sitio Lower Kawayan, Brgy. Sambag II sa Dakbayan sa Sugbo. Camille Pateres, Romeo Limpangog, Gabriel Bonjoc ug reports nilang Jemmuel V. Man-on ug Jessa Novah M. Benitez (BANAT NEWS)