CEBU, Philippines - Giawhag sa Land Transportation Office-7 ang publiko nga mokumento o sugyot kung unsaon nga mahimong epektibo ang pag-implementar unya og balik sa gisuspensong Anti-Distracted Driving Act.
Kini human gisuspenso ang implimentasyon sa maong balaod kay nakadawat kini og daghang pagsaway gikan sa publiko.
Si LTO-7 regional director Alita Pulga nagkanayon nga pwede ipadala sa lto7actioncenter@gmail.com sa publiko ang ilang mga sugyot o panahom bahin sa maong balaod.
Gitahasan na sa Department of Transportation ang Land Transportation Franchising and Regulatory Board nga maghimo og public hearing matag rehiyon kabahin sa maong balaod.
Matud pa ni LTFRB-7 regional director Ahmed Cuizon nga nagpaabot pa sila sa direktiba sa DOTr.
Apan giklaro ni Pulga nga bisan pa suspendido ang implementasyon sa ADDA, pwede gihapon dakpon ang mga drivers nga mag-text o manawag o modawat og tawag samtang kini magmaneho sa ilang sakyanan.
Matud pa ni Pulga nga ubos sa Reckless Driving - 1st offense P2,000; 2nd offense P3,000 ug tulo ka buwan nga suspension sa driver's license; 3rd offense P10,000 ug six months suspension nga magsugod inig bayad; ug succeeding offenses, revocation driver’s license.
Si Julieto Flores, ang tigpamaba sa Cebu Provincial Bus Operators mihangop sa pagsuspenso sa maong balaod ug angay gyud i-review ang Implementing Rules and Regulations kay giapil man pagdili ang pagbutang sa rosaryuhan sa windshields.
Matud pa ni Flores, kasagaran nga hinungdan sa aksidente sa kadalanan kay human errors, mechanicals defect, bad roads ug weather conditions, dili ang rosaryuhan.
Si Greg Perez, ang coordinator sa Pinagkaisang Samahan ng mga Tsuper at Operator Nationwide-Cebu nagkanayon nga para nila angay lang nga hunungon ang implementasyon sa maong balaod.
"Tungod daghan ang wala makasabot, nahasol ug daghan ang mabiktima sa taas nga multa niini. Kulang ang pagkunsolta sa mga hingtungdang sektor," matud pa ni Perez.
Si Romeo Armamento, ang vice president of the National Confederation of Transportworkers Union-Central Visayas, diin aduna kini 2,000 ka members-drivers mapasalamaton sila nga i-review ang IRR. (BANAT NEWS)