CEBU, Philippines - Dul-an P3 milyones nga kantidad sa shabu ug dul-an 30 ka tawo ang nadakpan sa managlahing mga anti-illegal drugs operation dinhi sa Sugbo.
Sa Danao City, P957,576 nga kantidad sa shabu ang nasakmit gikan sa lima ka suspek sa managlahing buy-bust operation sa barangay Poblacion.
Ang mga nasikop mao silang Jeffrey Rory Alerta 34, Kris Jay Cañetan, 23, Gary Lavador, 41, Cristino Emiliano ,34, ug Jonah Francis Tabla, 25, nagpuyo sa naasoy’ng dapit. Nakuhaan ang grupo og 18 ka gagmay og 16 ka medium nga shabu.
Gibutyag ni Police Officer 3 Phil Restauro sa Danao City Police nga sakop sa usa ka notadong drug pusher nga si Jojit Gacama ang lima. Si Gacama nadakpan na niadtong Domingo.
Samtang, P560 mil nga shabu ang nasakmit sa gipahigayong buy-bust operation sa Regional Drug Enforcement Unit (RDEU) 7 batok sa usa ka drug pusher sa Sitio Silangan Dos, sa Barangay Tejero, Cebu City kagahapon.
Ang nasikop kanhi checker sa usa ka shipping company nga si Joefel Mancio Arcenal, 40, nga nakuhaan og 95 ka gagmay ug walo ka dagkong pakete.
Si Police Senior Inspector Ian Macatangay, team leader sa Regional Drug Enforcement Unit (RDEU) 7 nagkanayon nga bag-o pa nga ‘player’ sa drugas si Arcenal. Sa dakbayan sa Lapu-Lapu, lima apil ang tulo ka babaye ang gidakop diha sa sulod sa motel sa Barangay Pajo sa grupo ni Senior Inspector Felix Cleopas III sa Presinto 3.
Ang nadakpan naglakip sa ilang target nga pusher nga sila si Romeo Halipot Arsolon alyas Jun-Jun, 35 anyos, Gleezy Pinote Araneta alyas Jen-Jen, 27 ug runner niini nga si Noel Velayo Asperin, 18 anyos nga nagpuyo sa maong dapit. Kinse ka putos nga shabu ug usa ka medium size ug drug paraphernalia ang nasakmit kanila. Nadakpan usab sa Purok Balanghoy sa Barangay Gun-ob sila si Dennes Quevo Gintivia, 25 ug Angelito Padilla Flores alyas Barok.
Kagahapong adlawa, P561 mil nga kantidad sa shabu ang nasakmit sa PDEA-7 diha sa Duljo-Fatima sa siyudad sa Sugbo batok sa magtiayong Eric Lauron, 44, ug Jorel Lauron 38.
Samtang niadtong Huwebes nasikop sa PDEA-7 sa Barangay Calamba silang Renel Borda, 21, ug Ed John Bequilla, 20, samtang nakaikyas ang kauban niini nga si Jen-Jen Baldesamo. Nakuha ang 28 ka gramo nga shabu nga mokantidad og P28 mil Niadtong Huwebes, 14 ka drug pushers ang nasikop sa buy-bust operation sud sa usa ka hotel sa Barangay Mabolo sa siyudad sa Sugbo nga naglakip sa usa ka Dick Mapalo, 35, nga giingong hired killer ug maoy suspek sa pagpatay sa usa ka police asset.
Sumala pa ni City Police Director Joel Doria ilang susihon kun kinsa nga druglord konektado ang grupo.
Sa Inayagan, siyudad sa Naga nadakpan usab silang Jason Pepito, 23, ug Nel Lipogpog, 26, pulos taga Sitio Palanas sa maong barangay ug nakuhaan og balor P122 mil nga shabu.
Samtang sa Talisay City, usa ka giingong kanhi sakop sa DU30 Marshal Unified Force ang gidakop human gidudahang maoy responsable sa pag-ikyas sa mga target nga drug pushers sa kapolisan.
Nakaikyas si Edna Cabo alyas Nanay, 57, ang numero unong target sa kapolisan diha sa Sitio Mahayag, Barangay San Isidro tungod sa matud pa pagtabang ni Hermie Dales, 38, nga giingong sakop kaniadto sa DU30 Marshal Unified Force nga force multiplier sa kapolisan.
Si SPO1 Jeffrey Diola nagkanayon sa dihang nitunol na sa kwarta ngadto ni Cabo ang ilang poseur buyer namay-ongan kini ni Dales kinsa daling mipadagan sa maong ginang hangtud nga kini nakaikyas. Apan si Dales ilang nakuptan. Camille Pateres, Rowena Capistrano, Romeo Limpangog ug Gabriel Bonjoc (BANAT NEWS)