CEBU, Philippines - Giangkon ni Talisay City Vice Mayor Alan Bucao nga samtang nagpadayon ang ilang imbestigasyon kalabot sa kontrobersiya sa Federation of Talisay City Urban Dwellers Association (FETCUDA) nakadungog siya nga aduna’y mga tawo nga nisuway og tukod og laing grupo sa mga urban poor. Si Bise Mayor Bucao nipadayag nga padayon ang ilang imbestigasyon kalabot sa petisyon sa mga grupo sa FETCUDA nga ilang pailisan si Konsehal Doroteo Emit isip maoy chairman sa urban poor.
Gani si Bucao nipadayag nga sa sunod semana mopagawas na man sila og desisyon. Siya niingon nga nakadungog siya og mga estorya nga aduna’y laing grupo nga mohulip sa FETCUDA apan sa iyang bahin wala nila nahisgutan sa konseho ang pagwagtang sa FETCUDA.
Para kaniya mas maayong ilisan ang mga tawo nga nagdala sa FETCUDA tungod kay dili man ang maong kapunongan ang hinungdan sa kontrobersya kundi ang mga tawo man nga nagdala maoy hinungdan niini. Dugang pa ni Bucao nga mayoriya sa konseho dili motugot nga wagtangon ang FETCUDA ug magtukod og laing grupo.
Si Emit gipetisyonan sa grupo sa FETCUDA tungod kay nawad-an sila og pagsalig kaniya.
Apan aduna’y nitumaw nga grupo sa mga presidente sa urban poor ang nipakita sab og simpatiya ni Emit nga giingong nagtukod usab og laing grupo nga atbang sa FETCUDA. (BANAT NEWS)