CEBU, Philippines - Gihimakak sa tigpamaba sa Artsidyosesis sa Sugbo, Mons. Joseph Tan, nga nihatag sila og gag order kang Fr. Roy Bucag nga dili na moluwat og pamahayag batok sa kagamhanan sa Lungsod sa Santa Fe.
Kini may kalabutan sa kontrobersyal nga Isla Music Festival atol sa Semana Santa nga gisupak ni Bucag ug sa mga parokyano.
Apan matud ni Tan nga gipahimangnuan si Bucag sa iyang kaubanan ug kahigalaan nga dili na lang moluwat sa bisan unsa nga mga pamahayag aron dili na mobukal ang panagsungi.
Si Archbishop Jose Palma nibutyag nga nagkatagbo na sila ni Bucag ug andam siya mopaluyo sa mga kalihukan niini. Atol sa Chrism Mass kagahapon sa buntag sulod sa Cebu Metropolitan Cathedral nga gipasiugdahan sa Archdiocese of Cebu, wala na mohatag og komento si Bucag dihang gikuhaan og pamahayag sa mga tigbalita. Nikabat sa 350 ka pari ang nitambong sa Chrism Mass nga gipangulohan ni Palma diin gibendisyonan sa Arsobispo ang lana para sa masakiton, lana sa chrism, ug lana sa cathecumen nga bitbiton sa kaparian ngadto sa ilang tagsa-tagsa ka parokya.
Atol sa kalihukan gibag-o sa kaparian ang ilang mga panaad.
Awhag sab ni Palma nga bisan sa kadaghan nga mga dili maayo og binuhatan dili gyud mawagtangan og paglaum ang kaparian ug katawhan nga magdala sa mga maayong balita.
Sumala pa ni Palma nga angay lang ang mga maanindot nga mga balita ang isabwag sama sa mga makadasig nga sugilanon ug dili ang mga balita nga nagdala og kabalaka ug kahadlok. (BANAT NEWS)