Lolo milugos sa duha ka apo

CEBU, Philippines - Nagtingkagol sulod sa prisohan ang usa ka 65 anyos nga lolo human kini gireklamo sa iyang duha ka mga apo nga iyang gilugos diha sa usa sa mga bukirang barangay sa dakbayan sa Sugbo.

Sa impormasyon gikan sa Guadalupe Police Station-9, ang 65 anyos nga suspek (pangalan gipugngan sa Banat News) giingong hubog atol sa paghimo niini sa krimen ngadto sa mga apo nga nag-edad og 8 anyos ug 6 anyos.

Si Police Officer 2 Yolanda Arcillas sa Women and Children Protection Desk sa Guadalupe Police miingon nga nahitabo ang krimen pasado ala una niadtong nakalabay nga kaadlawon ug ang gimolestiya niini ang 6 anyos nga apo diha mismo sa balay sa bata.

Ang amahan sa 6 anyos maoy mitug-an sa mga polis human misumbong ang bata kaniya. Ang suspek wa makalighot pagsikop kaniya sa mga polis.

Ang suspetsado nga gikuhaan og pamahayag sa mga tigbalita miangkon sa krimen ug miingon nga hubog  kini sa dihang iyang gimolestiya ang iyang apo.

Mitug-an usab kini sa mga polis nga gimolestiya usab niya ang magulang sa 6 anyos nga 8 anyos niadtong Disyembre samtang siya nahubog.

Nangayo kini og pasaylo sa amahan sa mga bata.

"Pwerteng huboga nako. Og di pa ko hubog ato, di g’yud ‘to nako buhaton," pamahayag pa niini.

Ang mga bata ang gidala sa Pink Room sa Vicente Sotto Memorial Medical Center alang sa dugang paghiling samtang giandam na sab ang kasong rape ug child abuse batok niini. - /EIM) (BANAT NEWS)