CEBU, Philippines - Walay nakitang kalapasan sa tawhanong katungod si Gobernador Hilario Davide III sa pagpahubo sa mga piniriso sa Cebu Provincial Detention and Rehablitation Center (CPDRC).
Kini human nga ang Commission on Human Rights, miimbestigar na sa nahitabong pagpahubo sa mga priso didto sa provincial jail atol sa Greyhound operation niadtong Martes.
"Wa man sila gi-maltreat tingali or unsa. They were just there and rounded up as to remove their clothings kay wa ta kabawo unsa bay gipanago nila.
So I don't see anything nga violative sa human rights or dignity or unsa ba ron… It's a part of procedure," matud ni Davide.
Ang CHR mihimo kini og imbestigasyon human nag viral ang hulagway sa mga priso nga way sapot ug gitapok sa quadrangle sa CPDRC.
Kagahapon ang mga sakop sa CHR mibisita sa CPDRC aron sugdan ang imbestigasyon apan wala dayon makasulod kay wala sila tugoti sa OIC sa CPDRC nga si Bobby Legaspi kay walay abiso kanila ang Kapitolyo kabahin sa pag-adto sa CHR .
“We just want to ask the inmates what happened during the greyhound operation.
We want to know if they are aware on the reason why they were stripped naked at that time,” matud ni Atty. Leo Villarino, ang chief investigator sa CHR-7.
Si Villarino nagkanayon nga apil sa ilang imbestigahon si Bobby Legaspi ug ang narelibohan nga acting warden nga si Dr. Gil Macato.
Apan si PDEA-7 Director Yogi Felimon Ruiz nakapangutana nganong karon pa adunay reklamo bahin sa pamaagi sa PDEA.
Matud pa ni Ruiz gipahubo man sab nila kaniadto ang mga piniriso sa Cebu City Jail ug Provincial Jail sa nanglabay nga mga greyhound operations.
Sumala pa ni Ruiz nga 68 ka mga hait nga hinagiban ang ilang nakompiska kauban sa mga shabu, linibo nga kwarta ug daghang mga selpon.
Atol sa maong operasyon 289 ka operatiba sa PDEA-7, kapulisan ug militar ang mirekisa sa 3,600 ka mga piniriso.
Apan bisan og gipahubo ang tanan gipaniguro ni Ruiz nga wala nalapas ang ilang katungod.
“Kung naa’y isa sa akong tao nadunggaban, kung nadunggaban sa liog, kinsa ma’y mo-explain sa iyang rights sa iyang pamilya? Nga mao na’y nahitabo I’m sorry nga that happens because we have to maintain the rights of the prisoners nga wa nato pahuboa nga naa diay nakasukbit nga kutsilyo, I better face criticism” saysay pa ni Ruiz.
Samtang si Cebu Archbishop Jose Palma niawhag sa mga law enforcers sa pagtratar og maayo sa mga priso bisan sa unsang klase sa krimen ilang giatubang.
"Put yourselves in the shoes of this people and their families. Is this the best approach?" pangutana pa sa Arsobispo. Le Antojado, Jojo Ugdol, ug Rowena Capistrano (BANAT NEWS)