CEBU, Philippines - Pormal na nga nilingkod ang bag-ong mayor sa Lungsod sa Dumanjug, Rene Asentista, human gipalagpot sa Ombudsman si kanhi mayor Efren Guntrano Gica sa serbisyo.
Kagahapon si Asentista uban sa mga kapitan sa kabarangayan ug ni Gica nipadayag ngadto kang Gobernador Hilario Davide III sa ilang mga yangungo.
Kini naglakip sa farm-to-market road, patubig ug kuryente nga nasugdan na ni Gica nga tinguha ni Asentista nga iyang padayonon.
Samtang nanghinaut si Gica nga mausab pa ang desisyon sa Ombudsman.
Matud ni Gica nga duha ka semana na ang nakalabay human siya nakaduso og motion for reconsideration sa Ombudsman apan hangtud kagahapon wala pa siya kadawat og resolusyon sa pagresolbar niini.
Iyang gitumbok ang rules sa Ombudsman nga sulod sa lima ka adlaw gikan sa pagduso sa MR iresolbar na kini.
Ang buhatan sa Ombudsman nipalagpot kang Gica sa serbisyo tungod sa giingong pagpaburot sa kantidad sa gasto sa ilang panihapon uban sa mga opisyal sa barangay dihang nilingkod kini isip acting mayor niadtong Abril 11 hangtud Hunyo 11, 2014.
Giingong giilisan ni Gica ang original nga kantidad sa resibo nga P11,435 ngadto sa P21,435.
Ang reklamante nga si kanhi mayor Nelson Gamaliel Garcia ang niduso og pagsupak sa MR ni Gica.
Si Gica sa iyang bahin nibutyag nga kagahapon gikatakdang moduso siya og tubag sa opposition ni Garcia. (BANAT NEWS)